မလေးရှားနိုင်ငံသို့ ရောက်ရှိပြီး စာချုပ်ဖြင့် တရားဝင် လုပ်ကိုင်နေသော မြန်မာအလုပ်သမားများ စာချုပ်သက်တမ်း မပြည့်မီ မြန်မာနိုင်ငံ ပြန်လိုပါက လျော်ကြေးပေးပြီးမှ ပြန်ရန် မလေးရှား လုပ်ငန်းရှင်များ တောင်းဆိုနေကြောင်း မလေးရှားနိုင်ငံသို့ ရောက်ရှိနေသော The Daily Eleven သတင်းထောက်က သတင်း ပေးပို့ပါသည်။
ပုံမှန်အားဖြင့် သုံးနှစ်သက်တမ်းရှိသော စာချုပ်ဖြင့် မလေးရှားနိုင်ငံသို့ တရားဝင် လာရောက် လုပ်ကိုင်နေသူများသည် စိုးရိမ်စိတ်များကြောင့် စာချုပ်မပြည့်မီ မြန်မာနိုင်ငံသို့ ပြန်ရောက်လိုပြီး ထိုသို့ ပြန်လိုပါက လျော်ကြေးငွေ မလေးရှားရင်းဂစ် ၁၂၀၀ မှ ၃၅၀၀ အထိ ပေးသွင်းရန် တောင်းခံနေကြောင်း မလေးရှားရောက် မြန်မာအလုပ်သမားများထံမှ သိရသည်။
''ကျွန်တော့်ဆီကို ဆက်သွယ်လာတဲ့ အလုပ်သမားတွေက ဒီကိစ္စကို အများဆုံး ပြောကြပါတယ်။ သူတို့ ဒီလိုဖြစ်နေတယ်။ ကူညီပေးပါဆိုပြီး ပြောပါတယ်။ သူတို့ရဲ့ အလုပ်ရှင်တွေကို ပြောတဲ့အခါ စာချုပ်မပြည့်သေးဘူးဆိုရင် လျော်ကြေးပေးရမယ်လို့ပြောပါတယ်။ ကျွန်တော့်ဘက်က အဆင်ပြေဆုံး ဖြစ်နိုင်အောင် ကြိုးစားပေးနေပါတယ်'' ဟု မလေးရှားနိုင်ငံ မြန်မာသံရုံး၌ အလုပ်သမားရေးရာ ကိစ္စရပ်များကို ကိုင်တွယ်ဆောင်ရွက်နေသူ သံအရာရှိ ဦးစိုးဝင်းက ဇွန် ၂၀ ရက်တွင် The Daily Eleven သတင်းစာသို့ ပြောကြားသည်။
ဦးစိုးဝင်းသည် မြန်မာအလုပ်သမားရေးရာ ကိစ္စရပ်များကို ကိုင်တွယ်ဖြေရှင်း ဆောင်ရွက်ပေးနိုင်ရန် မလေးရှားနိုင်ငံသို့ စေလွှတ်တာဝန် ပေးထားသည့် ပထမဆုံး သံအရာရှိဖြစ်ပြီး မလေးရှားနိုင်ငံသို့ ရောက်ရှိနေသည်မှာ တစ်လကြာမြင့်ပြီ ဖြစ်သည်။
''ပြန်ချင်တယ်။ စာချုပ်က တစ်နှစ် ကျန်သေးတယ်။ သူဌေးကို ပြောတယ်။ ပြောတော့ လျော်ကြေး ရင်းဂစ် ၂၀၀၀ ပေးရမယ်လို့ ပြောတယ်။ မပေးနိုင်တဲ့အတွက် ဆက်နေရမှာပဲ။ စာချုပ်သက်တမ်းကုန်ရင်တော့ ပြန်တော့မယ်'' ဟု မလေးရှားနိုင်ငံရှိ ကုန်တိုက်တစ်ခုတွင် အလုပ်လုပ်ကိုင်နေသော မယမင်းအောင်က ပြောကြားသည်။
စာချုပ်သက်တမ်း မပြည့်သေးဘဲ ပြန်လိုသူများ လျော်ကြေးငွေ တောင်းနေသကဲ့သို့ စာချုပ်သက်တမ်းပြည့်ပြီး ပြန်လိုသူများကိုလည်း လျော်ကြေးငွေ တောင်းခံနေကြောင်း သိရပါသည်။
ပတ်စ်ပို့လည်းရှိတယ်၊ ပါမစ်လည်း ရှိတယ်။ levy ကြေး (မလေးရှားအစိုးရသို့ ပေးဆောင်ထားသော အခွန်ငွေ) လည်း ပုံမှန်ဆောင်တယ်။ အလုပ်လုပ်နေတာက ငါးနှစ်ရှိပြီ။ စာချုပ်သက်တမ်း ပြည့်ပြီးတာ နှစ်နှစ်ကျော်နေပြီ။ အဲတာကြောင့် ပြန်မယ်လို့ပြောတော့ လျော်ကြေးပေးရမယ်လို့ သူဌေးက ပြောတယ်။ ရင်းဂစ် ၃၀၀၀ ပေးရမယ်တဲ့။ ဘယ်လိုပေးနိုင်မှာလဲ... |
မလေးရှားနိုင်ငံသို့ လာရောက် အလုပ်လုပ်ကိုင်သူ မြန်မာနိုင်ငံသားများ၏ ပတ်စ်ပို့ စာအုပ်များကို အလုပ်ရှင်နှင့် အေးဂျင့်များက သိမ်းယူထားပြီး ပြန်ရန်အတွက် ပတ်စ်ပို့စာအုပ် တောင်းချိန်တွင် ထိုကဲ့သို့ လျော်ကြေး တောင်းခံနေကြခြင်း ဖြစ်သည်။
အလုပ်သမား၏ ပတ်စ်ပို့ကို အလုပ်ရှင်က သိမ်းယူထားခြင်းကို မလေးရှားနိုင်ငံ၌ ဥပဒေအရ ခွင့်ပြုထားခြင်း မရှိကြောင်း သိရသည်။
''အလုပ်သမားရဲ့ ပတ်စ်ပို့ကို အလုပ်ရှင်က သိမ်းထားတယ်ဆိုတာ ဥပဒေအရ ခွင့်မပြုဘူး။ ဒါပေမဲ့ ဥပဒေအရ ခွင့်မပြုလို့ ပြန်ပေးပါလို့ တောင်းတဲ့အခါ ဒီအလုပ်သမားတွေ ထွက်မပြေးအောင် ဘယ်သူတာဝန်ယူမလဲ ဆိုတာကို ပြန်မေးကြတယ်'' ဟု ဦးစိုးဝင်းက ပြောကြားသည်။
စာချုပ်သက်တမ်း မပြည့်မီ အလုပ်ရှင်၏ ခွင့်ပြုချက် မရရှိဘဲ မြန်မာနိုင်ငံသို့ ပြန်မည်ဆိုပါက အလုပ်ရှင်များက မလေးရှား လူဝင်မှု ကြီးကြပ်ရေးသို့ အကြောင်းကြား ထားခြင်းများ၊ မလေးရှားလူဝင်မှု ကြီးကြပ်ရေးမှ အလုပ်ရှင်ထံသို့ ဆက်သွယ်မေးမြန်းခြင်းများ ရှိသည့်အတွက် အလုပ်သမား ဥပဒေများဖြင့် အရေးယူ ခံရနိုင်ကြောင်း သိရသည်။
''တရားမ၀င် အလုပ်သမားတွေက သံရုံးမှာ အထောက်အထားလျှောက်ပြီး မလေးရှား လူဝင်မှုကြီးကြပ်ရေးမှာ ဌာနပြန်ခွင့် လျှောက်ပြီး ပြန်လို့ရတယ်။ တရားဝင်စာချုပ်နဲ့ လုပ်နေတဲ့သူတွေက အလုပ်ရှင်ခွင့်ပြုချက် မရဘူးဆိုရင် ဘာမှလုပ်မရဘူး။ ပတ်စ်ပို့၊ ပါမစ်ပျောက်ဆုံးဆိုပြီး တရားမ၀င် အလုပ်သမားပုံစံနဲ့ သွားလျှောက်တဲ့အခါ မလေးရှား လူဝင်မှုကြီးကြပ်ရေးမှာ စာရင်းရှိပြီးသား ဖြစ်နေတယ်။ ဒါမှမဟုတ်ရင် သူတို့က အလုပ်ရှင်ဆီလှမ်းပြီး ဆက်သွယ်တယ်။ အဲဒါပေါ်သွားရင် မြန်မာနိုင်ငံကိုပြန်ဖို့ ခွင့်ပြုချက် မပေးတော့ဘူး'' ဟု မလေးရှားနိုင်ငံတွင် ရှစ်နှစ်ကြာနေထိုင်ပြီး အလုပ်လုပ်ကိုင်နေသူ ကိုဝင်းအောင်က ပြောကြားသည်။
မလေးရှားရောက် တရားဝင် မြန်မာအလုပ်သမားများ အနေဖြင့် တစ်လလျှင် မလေးရှားရင်းဂစ် ၆၀၀ မှ ၁၂၀၀ ၀န်းကျင်ခန့်သာ ရရှိကြသဖြင့် အလုပ်ရှင်များ တောင်းဆိုနေသော လျော်ကြေးငွေကို ပေးဆောင်နိုင်သူ မရှိသလောက် ဖြစ်နေကြောင်း သိရှိရသည်။
Eleven journal
No comments:
Post a Comment